Getandu nos requeixos

Asina foi, getandu nos requeixos pulos montes del mieu valle cuandu tuvi la esperanza d´emprincipiar outru camín, al llau de la muntaña. Pa qu´ésta nun me viera solu cumu un probe home, cuitadín de las suas priocupaciones.Y agora tamos coyendu outra senda, que remembra la nuesa llingua, xuntu al rieu, la vallina ou la regera, el terraplén ou´l picu más altu d´aqueilla muntaña que viéranos medrare, pa lu bonu ou lu que seya, pa que los nuesos fiyos sepan cuntiare daqué de las siñas que recoyimos a modín y qu´entá son las de nuesu: llïoneses de la tierra.

Dempués vinun los vientos y los glayíos d´aqueilla outra peña prieta, qu´asemeyaban los ruyíos d´una muyer pariendu, cuandu pasáramos al traviés de la fouz que remarcaba´l rieu ente las rocas. Yera cumu si nos viera, nos sintiera cruzare pul sou dominiu, y tamién nos geyara agresivamente peru cun ciertu murniu, purque pescanciaba qu´éilla nun podía movese y nosoutros avanzábamos, dandu tumbos alloucaos, deixandu el punxu de las nuesas falas entemecíu nos furacos de la sua lladera.

Hasta qu´a la fin chegamos onde taban los outros homes, qu´esperaban venos dende que´l ruíu de la llucha apagóuse nos sous oyíos. Las pallabras tuvun entoncias un sinificáu: el de penetrar en toos los requeixos del mundiu, rompiendu las torgas qu´impedían conocenos.