D´estadísticas y númberos.

Dempués del cimeiru día de lliga de fúbol n´Hespaña pueden atopase "serias" custiones basadas nas declaraciones de los protagonistas y nas estadísticas.
Claru que tou eillu rellacionáu cunos dous clubes más glamourosos y de los que nun digu los sous nomes, pur conocíos.

El primeriu dambos ganóu nel sou estadiu y asegura qu´eillos son llíderes (cun tan sólu una xornada xugada), que tan pur enriba´l contrariu y que tien marcaos más goles que los outros. A la escontra, dicen-yes los "enemigos" fuboleiros que xamás recibieran un gol tan mañaneiru na sua cá (nel primer minutu de xuegu), y que sólu tienen una difrencia d´un gol menos nel sou casilleiru, ente los marcaos y los recibíos.

Del segundu equipu salen frases cumu que nun perdieran entá dengún partíu, que tamién tan invitos y que nun tienen goles escontra; amás qu´eillos xugaran fuera de la sua cá esi cimeiru choque. Pur contra, escueitan estas outras cousas: qu´entovía nun marcaran goles, que tan pur baixu´l rival y que yá sacan-yes más d´un gol a favor.

Lu más curiosu d´esta tema yía que, sigún tomaramos caún de los xeitos enantias pronunciaos, tendríamos hasta tres posibilidaes estadísticas en basa a los númberos:
a.- Dambos equipos tan ensin perdere dengunu de los partíos cellebraos, y pur eillu empatan na clasificación.
b.- Unu de los clubes entá nun marcóu goles nel sou partíu, y el contrariu cheva-ye más d´ún de difrencia; y pur casu, aquél ta´l cabeiru na clasificación y l´outru yía´l llider.
c.- Emperu, el que nun marcara goles asevera que nun-yes recibieran, entantu´l contrariu percibéu únu al minutu de xuegu, y pur eillu tan llideres na clasificación d´equipos menos goleaos; cul sou porteiru llider del trofeu "Zamora".

Pues d´esas cousas tien el fúbol.

Nel outru midiu mundiu

Nestos días de vacancias albidréi deixar esta páxina ensín nuevas; peru velaiquí que, tandu desveláu, chegóu a las mías manos un cómic enforma orixinal; dichu estu pula autora del mesmu, una muyer, amás iraní, anque eilla siguru que prefier nomase persa: Marjane Satrapi.

La obra chámase “Persépolis”, y trata una tema autobiográfica, puestu que yía la esperiencia de la creyadora dientru del tiempu que xurde nel sóu país (Persia) dende que yera una chavalina hasta la etapa quei chevóu al esiliu. Y nesa domina marca la situación despótica del Irán del Shah, cuandu Satrapi se defín cumu una xoven moza y "revolucionaria islámica, cousa que tamién siente rara purquei bien diz y you asientu: ¿Cúmu pue ser una revolución “islámica, ou cristiana, ou xudaica, ou budista”? La relixón nun debería causare xamás una revolución sociu-económica, purque yía un poblema de conciencia y de fé.

Pesia esa crisis nel sou pensamientu nun deixa d´atalantare que la ditadura d´aquel intre tien los días contaos, y esu supérase cun aqueilla rebelión islámica; custión que vinu asocedere van yá cuasi una trentena d´años.

Lu más curiosu del cómic, amás de los dibuxos desemeyaos pur tétricos, yía la evolución ideolóxica de Satrapi, xuntu al caltenimientu d´una postura interna dina d´almiración: enxamás sostien que la relixón que deprendióu de los sous pais fuera una torga, inclusu pur ser eilla una muyer –islámica-, pal sou desendolque cumu presona; peru la revolución qu´eilla mesma sofitóu nun yera la solución, ya que se prïocupaba d´afogar los xuicios racionales d´una mínima crítica; hasta´l puntu de que pue apreciase que nun algamamos pescanciar cuala de la dúas datas seya meyor pa los persas: si la despótica del Shah ou la necrópita islamista. Si sigimos a pasu las viñetas, n´ambas épocas torturan, afogan y fuliminan a dalgunos de los sous familiares.

Cumu sigidor del mundiu de los cómic animu a lleer esta “hestorieta” de Satrapi, pa la súa memoria.

¿Quéi semos?

Agora que s´alderica na prensa sobru la conveniencia ou non de sere "nacionalista llïonés" vou facere un esfoutu de reconocencia.

Anque cimeiru habría que dicire que l´alderique nun yía talu, purquei nun s´espresa la disyuntiva de sere ou nun sere, de querere ou nun querere, de camentare ou negare. Non, lu que se diz nos midios escritos yía un cartelu espublicitariu: el sentimientu nacionalista yía malu en sí mesmu, yía malu pur natura, y pur tantu los mozos llïoneses afincaos nesos síntomas tan malades, y lu pïor yía que nun tienen cura (párrocu sí).

Yía ciertu que nun esiste alderique cuandu nun s´entruga a la xente (mueitu menos a la mocedá que vien darréu) sobru la identidá de sóu; nin tampoucu se desemeyan las basas afitadas a esas posibilidaes. Trátase tan sólu de criticare un posicionamientu cul que nun tan d´alcuerdu ni´l colunista nin l´editor.

A vegadas atalantu na mía mente purquéi nun supi hasta van poucos años la situación rïal de la llingua llïonesa (naide díxume que dalgunos vecinos falasen mal purque fueran poucu llistos), y xamás pescanciéi quéi pueblu del solar hispanu yera más difrenciáu cumu talu que´l pueblu llïonés; másimu cuandu esti asomaba d´antañu valores sociu-culturales que facían-ye tomare soluciones propias pa los desendolques que chegaban cul pasu los años. Ñiciativas únicas y desemeyadas en tolas las tareyas d´una coleutividá, la llïonesa, que nun se cunocen nos colexos, pesia que n´outras comunidaes puedense tratare temas tan simples cumu la Hestoria de... (Comunidá Autónoma).

De siempres creyí qu´antias las comunidaes de presonas cun rasgos, llinguas, istituciones, vezos, asentamientos y -sobrutou- soluciones llindantes y semeyantes pa cunos avances del progresu yeran pueblos ou nacionalidaes peculiares; y los sous miembros nacionales d´esi conxuntu más ou menos uniforme, que non iguador.

Las críticas escontra tales basas, ensin distingire los conceutos nin dare dreichu al retruque, pueden dirigise tamién escontra cualesquier outra cultura que cumu "nacional" tenga na sua mente´l mesmu colunista.

L´élite

Dende cuantayá tolas sociedaes tuvun un garrapiellu ou conxuntu de presonas que rempuenden al sinificáu de la pallabra élite: miembros destacaos d´una agrupación de homes (ou muyeres), en función de las suas meyores cualidaes al respeutive´l sou grupu.

Asina fou nas sociedaes clásicas griegas ou romanas: cimeiru nel mundiu militar formónunse los hoplitas ya espartanos, cumu soldaos d´élite pulas carauterísticas de preparación y formación pa las gerras.
Del citáu campu xurdienun pa las ágoras griegas los sabios y filósofos conocíos pur tol universu. Yera una élite del pensamientu.
Mas acá, nel senáu román tenemos a los "senatores" de la república, ou más bien de "la cousa de toos"; y éstos destacaban na vida política sobru n´outras cuestiones, que tamién (casu de las cospiraciones).

Fuimos caminandu pula hestoria y tuvimos élites relixosas, qu´entá perduran, élites del saber empíricu y outras sociu-culturales.

Hasta que van poucos años diónunse las élites feixistas, cuya másima a consigire yera la desapaición de la "clases inferiores"¡ Cumu nun son a chegar a una élite!

Peru guei caltenemos outru conceutu elitista: los apoltronaos; que provienen d´una mestura d´élites, purquei tien daqué de todas eillas. Son políticos de profesión, cuyu meyor logru yía caltenere l´escañil consigíu nunas eleiciones, anque pierdan tolas que son a presentase; esa práutica tiénenla cumu un dogma relixosu, y escontra de las suas tïorías pueden declarare las gerras que quisieran, atalandu cualesquier tiorema filosóficu cuandu nun quieren deixar de garrare ya esprimire "la cousa pública".

De bombas, voladores y fuegos d´artificiu

Nun falamos d´esas bombas que se ponen pa matar a las presonas, sinon d´esos cuetes que van pulos cielos ou las nueites escuras, faciendu temblare las ñubes ou allumandu las estrellas.

Nestas cabeiras folixas de la ciudá de Llión, nuna d´esas nueites parámosnos la mía familia y ún mesmu pa contemplare l´espeutáculu, xustu nos bancos ubicaos alrodiu´l MUSAC.

Tabamos cun preste sentaos, gueyandu palas alturas, oservandu las esplosiones de colorines y los "erutos" de soníu qu´atoraban los nuesos oyíos. Yera una sensación placenteira asgaya, que nun sabía si podía superase.

Atalantandu n´esi gozu recostéime nel bancu p´atrás, cunos gueyos pechaos.

Cuandu fou abri-yes cuntempléi outra mirada, si cabe, más enriquecedora: detrás de nosoutros, los fuegos d´artificiu reflexaban nos cuadros cristalinos del edificiu, y la sua visión -tumbáu cumu you n´aquel bancu y cuna mirada hacia trás- suponía una imaxen abondu difrente del xeitu pa gueyare los fuegos.

Los reflexos de la lluz duplicaban los fuegos sigún los cuadros refleutantes, al empar qu´en mueitos d´éillos la imaxen taba distorsionada, paecían pantamas xixilantes de la escuridá.

Fízume, y entá faime, gracia albidrare qu´a vegadas la obras modernistas nun s´alcuentran dientru de los museyos nin de las casas de bloque ou lladriellu, onde deillos autores quieren arrequeixar la cultura.

Nun toos pueden falare

Alrodiu la nuesa llingua escomienzan xurdire deillos especialistas; peru, nun falamos de presonas cun formación llinguística ni vezos de usu maternu nin d´apreciu mínimu pula mesma; tamos pensandu n´aqueillos colunistas d´opinión (de la sua opinión) pa los que siempres presenten torgas a culasquier asuntu que nun dominan; sedrá outra vueltina purqu´éillos nun tienen denguna clas nin siquier dominiu pa estudiar idiomas.





Tal vegada´l títulu d´esta entrada fuera meyor "Nun pueden toos falare": feichu ciertu que d´aqueillos especialistas, nun entamarían xamás a falare la llingua purquei´l sucosciente de sou torgaría una traba insuperable.





Peru lu curiosu d´esta tema, ca vegada que-ye camentan nos medios, son los puntos de negación d´esos opinantes:


1º.- Nun tan favoritibles pur cuestiones sociullinguísticas, tan sólu purque NON; bona rempuesta n´outros estadios hestóricos superables.


2º.- Tan a la escontra purque yía una tema "arcaica", "rural", "medieval", "d´antañu"... pur decire sólu dalgunos epítetos; ý esu dicinlu ensin cunocere ná sobru la formación, l´arraigu, la lliteratura, la sintásis, la evolución, las formas dialeutales del llïonés.


Quei bien quedaría you na UNESCO falandu del "manés", sobrutou agora que sou europeu y dominu cumu llingua oficial el francés; cumu parabola tien acoyimientu nesa estrutura quintacolunista.


3º.- Y la terceira pega que-ye ponen yía que cumu nun tien sofitu: pa quei vamos acubixare una llingua en pelligru d´estinción. Pues claru, yía de lu quei se trata y tamos lluchandu pur eillu: QUE LAS LLINGUAS MINORIZADAS TENGAN UN ESPACIU NAS ESCUELAS PA PROTEXELAS CUMU YÍA DEBÍU Y MARCAN LAS LLEIS.





Nun pueu deixare de mandar un recuerdu enforma pa la familia d´Eva González, la grande poetisa de la llingua llïonesa.

¿Puese criticare?

Entá tou ablucáu de lu que pudi vere na tele l´outru día; tiemblen las mías manos sólu pensalu.

Tratábase d´un programa d´una cadena llocal (ou asina nomábase nel llogu), que paez tien sofitu alministrativu pa desendolcare unos rexistros afinxaos na tierrina; peru claru, igual nun tienen ideyas na tiesta y lu que-yes dióu fou facere un programa sobru una xuntanza d´éillos mesmos, los miembros y compañeiros d´estudiu xantandu nún chigre, escuitandu las cuitas d´unos pa cunos outros; que si tu yes, quei bien lu pasamos, gueyai que bona pinta tien la cena...

D´entamu albidréi nas caras cunocidas de cuasi toos, peru llueu vinu a la mente de miéu qu´esos qu´eillí taban yeran ou considerábanse periodistas. ¡Claru, hai que trabayare las horas estras pa que-yes apoquinen! Mañana yá criticarán a "llistín" de turnu.