Nun falamos d´esas bombas que se ponen pa matar a las presonas, sinon d´esos cuetes que van pulos cielos ou las nueites escuras, faciendu temblare las ñubes ou allumandu las estrellas.
Nestas cabeiras folixas de la ciudá de Llión, nuna d´esas nueites parámosnos la mía familia y ún mesmu pa contemplare l´espeutáculu, xustu nos bancos ubicaos alrodiu´l MUSAC.
Tabamos cun preste sentaos, gueyandu palas alturas, oservandu las esplosiones de colorines y los "erutos" de soníu qu´atoraban los nuesos oyíos. Yera una sensación placenteira asgaya, que nun sabía si podía superase.
Atalantandu n´esi gozu recostéime nel bancu p´atrás, cunos gueyos pechaos.
Cuandu fou abri-yes cuntempléi outra mirada, si cabe, más enriquecedora: detrás de nosoutros, los fuegos d´artificiu reflexaban nos cuadros cristalinos del edificiu, y la sua visión -tumbáu cumu you n´aquel bancu y cuna mirada hacia trás- suponía una imaxen abondu difrente del xeitu pa gueyare los fuegos.
Los reflexos de la lluz duplicaban los fuegos sigún los cuadros refleutantes, al empar qu´en mueitos d´éillos la imaxen taba distorsionada, paecían pantamas xixilantes de la escuridá.
Fízume, y entá faime, gracia albidrare qu´a vegadas la obras modernistas nun s´alcuentran dientru de los museyos nin de las casas de bloque ou lladriellu, onde deillos autores quieren arrequeixar la cultura.
No hay comentarios:
Publicar un comentario