Nun toos pueden falare

Alrodiu la nuesa llingua escomienzan xurdire deillos especialistas; peru, nun falamos de presonas cun formación llinguística ni vezos de usu maternu nin d´apreciu mínimu pula mesma; tamos pensandu n´aqueillos colunistas d´opinión (de la sua opinión) pa los que siempres presenten torgas a culasquier asuntu que nun dominan; sedrá outra vueltina purqu´éillos nun tienen denguna clas nin siquier dominiu pa estudiar idiomas.





Tal vegada´l títulu d´esta entrada fuera meyor "Nun pueden toos falare": feichu ciertu que d´aqueillos especialistas, nun entamarían xamás a falare la llingua purquei´l sucosciente de sou torgaría una traba insuperable.





Peru lu curiosu d´esta tema, ca vegada que-ye camentan nos medios, son los puntos de negación d´esos opinantes:


1º.- Nun tan favoritibles pur cuestiones sociullinguísticas, tan sólu purque NON; bona rempuesta n´outros estadios hestóricos superables.


2º.- Tan a la escontra purque yía una tema "arcaica", "rural", "medieval", "d´antañu"... pur decire sólu dalgunos epítetos; ý esu dicinlu ensin cunocere ná sobru la formación, l´arraigu, la lliteratura, la sintásis, la evolución, las formas dialeutales del llïonés.


Quei bien quedaría you na UNESCO falandu del "manés", sobrutou agora que sou europeu y dominu cumu llingua oficial el francés; cumu parabola tien acoyimientu nesa estrutura quintacolunista.


3º.- Y la terceira pega que-ye ponen yía que cumu nun tien sofitu: pa quei vamos acubixare una llingua en pelligru d´estinción. Pues claru, yía de lu quei se trata y tamos lluchandu pur eillu: QUE LAS LLINGUAS MINORIZADAS TENGAN UN ESPACIU NAS ESCUELAS PA PROTEXELAS CUMU YÍA DEBÍU Y MARCAN LAS LLEIS.





Nun pueu deixare de mandar un recuerdu enforma pa la familia d´Eva González, la grande poetisa de la llingua llïonesa.

¿Puese criticare?

Entá tou ablucáu de lu que pudi vere na tele l´outru día; tiemblen las mías manos sólu pensalu.

Tratábase d´un programa d´una cadena llocal (ou asina nomábase nel llogu), que paez tien sofitu alministrativu pa desendolcare unos rexistros afinxaos na tierrina; peru claru, igual nun tienen ideyas na tiesta y lu que-yes dióu fou facere un programa sobru una xuntanza d´éillos mesmos, los miembros y compañeiros d´estudiu xantandu nún chigre, escuitandu las cuitas d´unos pa cunos outros; que si tu yes, quei bien lu pasamos, gueyai que bona pinta tien la cena...

D´entamu albidréi nas caras cunocidas de cuasi toos, peru llueu vinu a la mente de miéu qu´esos qu´eillí taban yeran ou considerábanse periodistas. ¡Claru, hai que trabayare las horas estras pa que-yes apoquinen! Mañana yá criticarán a "llistín" de turnu.

Yía la hora la margaritina

Sí, yía nestos intres cuandu se pauta.

Agora si, agora non, llueu tamién.

La margaritina pue quedase ensín fueyas de tantu pretendela.

Pa los que pautan, ¿quéi algaman, amás de la fueya nidia ou´l flash d´una istantánea?.

Y pa los que nun sofitan los pautos, sedrían eillos tan "xenerosos" estandu pendientes las cabeiras políticas a sigire.

Yía fácil enforma, y más cómodu, cuntiare que na oposición unu s´alcuentra bien; peru: ¿quéi políticas se facen na oposición?, y acasu ¿nun pretendes governare cuandu vas nuna llista eleitoral pa ser elexíu?

Probina la margaritina.

Las políticas sobru´l País Llïonés.

Sicasí tolas perspeutivas cumu los proyeutos quei se cunocen alrodiu´l nuesu Páis escaecen una tema básica en cualesquiera llínïa d´autuación: la consideranza d´un marcu territorial estable, nel cual sofitarán las aportaciones quei pasen las autorizaciones adecuadas y dótense de los correlativos presupuestos económicos.






Asina, gueyamos cumu se tratan los planes al respeutive del Llión Rïal 2.010: paez que fuera más una futura folixa pa la ciudá de Llión que la remembranza de lu que tien de sere, la recuperanza ou reconocencia de los fitos y resultaos granibles d´un cuasi-estáu que tuvu vixencia durante cientos d´años; y que desenvolvéu la esistencia de las presonas d´antañu cunas raigames d´anguañu. El Llión Rïal nun tien sentíu si escaecemos, sobrutóu, el restu ciudaes quei pertenecían al "vieyu" Reinu: idéntica repercusión y merecimientu quedan-yes a Salamanca, Bregancia, Zamora, Benavente, Estorga...




Lu mesmu debemos considerare al tratare d´outras soluciones pa cuestiones peculiarmente llïonesas: ¿cúmu pescanciare los problemas d´autualización, desendolque y uniformidá de la llingua ensin tenere definíu un marcu de territorialidá?, ¿puese tratare los asuntos conxuntos de los conceyos sigún una basa provincial únicamente?, ¿necesítase una istitución desemeyada y propia pal Páis?, y de ser afirmativu ¿sobru quéi formulas se debe creyare?





Pues esu: tolos que deseyamos la creyación de esi Páis Llïonés debíamos tenere na tiesta un mínimu de planeamientu sobru lu que semos y nun semos, peru atalantandu cumu vinimos a selu.

Tamos un poucu tolines

Guei día yía ún d´esos que nun te llevas sospresas, sobrutóu purquei velas venire: van volandu pula rede y esnalan ente la webs publicitarias; son garrapiellos d´intenciones, ou sólu deseyos de tapare lu que nun s´acomoda a una disciplina stasitaria.

Nun entrugan xamás pul cumu, nin pul purquéi; tampoucu saben ciertu la verdá de los autos axenos; tan sólu tiran a dare, ensin pescanciare que son tiros perdíos nos propios glayíos internos, que nun deixan parire outras intenciones, outros deseyos.

Guei yía un día fermosu cumu pa tare brincandu nos deseyos foriatos; los homes llibres taban na illa d´Avalon, y dende eillí soplanun los vientos que desfizun las torgas d´aqueillas llinguas amurniadas.

Llión: ¿ciudá invadida?

Cun motivu la celebranza del día de las fuercias armadas, nesta fin de selmana tuvimos pula nuesa ciudá una autividá militar "estraña".

Los garrapiellos de seguranza taban pur tolos llaos. Si dibas pal tou barriu atopábaste cun xiru obligatoriu; si marchabas pal trabayu tinias que coyere outra direición contraria.

Presonalmente, nun tuvi degún problema al respeutive; peru si gueyéi cumu tomábanse mididas alrodiu la proteición de nun sei qué intereses: controles cunos automovilistas, imovilización d´autos, revisión d´interiores, entrevistas nos domicilios, etc.

Llueu, el domingu, festivu asgaya -hasta la bandeira- tuvu llugar el desfile d´aqueillas fuercias que nunca ví. La xente aplaudía en xeneral, y los comentarios yeran cansinos a vegadas. Anque lu más priocupante pa min -midiupacifista cumu´l sapuconchu d´enriba- fonun aqueillos que nun allabanciaban la marcialidá del soldáu ni las muesas de cariñu, sinon las ganas de que las armas que s´amosaban entraran n´aición: ¡Quéi pepinu! ¡Cun esi tanquetu chegas a...! ¡Si fuera de mieu l´avión verías cumu...!

Peru tamién tuvu cousas bonas. Cumu la del rapacinu qu´en brazos del sou pai taba durmíu asgaya, queriendu dicire: "yía que la música militar nun súpume llevantare".

Dubardín el Pensativu.



Pula vaguada diba Dubardín, camentandu: Yá sólu réstame una hora pa chegar al pueblu.- Peru, anuechecía rápidamente y las lluces del atapecere s´afogaban cun ca ún de los sous pasos.

Ensin querere, emprincipióu rumiar aqueillas vieyas hestorias que-ye contóu´l sou guelu van años, n´aqueillos filandones d´hibiernos xélidos. Entá la sua mente yá nun paróu de dai vueltas en tola tarde.

De prontu, allá lluenxe paez movese daqué, sinuosamente, cumu si tuviera preparáu pal quite. A Dubardín nun-ye quedaba outra cousa que pasare xuntu´l sou lláu, asina que nun lu pensóu duas vueltas, aceleróu´l pasu enforma y, cuandu tuvu a la sua altura, la evidencia fou inequívoca, la siñal recoyóuse pur completu y desapaecéu, peru más alantre pudu comprobare cumu outru yá ocupaba´l sou llugar: yera la solombra del sigiente pindiu qu´arrodiaba más allá´l camín….