Cun motivu la celebranza del día de las fuercias armadas, nesta fin de selmana tuvimos pula nuesa ciudá una autividá militar "estraña".
Los garrapiellos de seguranza taban pur tolos llaos. Si dibas pal tou barriu atopábaste cun xiru obligatoriu; si marchabas pal trabayu tinias que coyere outra direición contraria.
Presonalmente, nun tuvi degún problema al respeutive; peru si gueyéi cumu tomábanse mididas alrodiu la proteición de nun sei qué intereses: controles cunos automovilistas, imovilización d´autos, revisión d´interiores, entrevistas nos domicilios, etc.
Llueu, el domingu, festivu asgaya -hasta la bandeira- tuvu llugar el desfile d´aqueillas fuercias que nunca ví. La xente aplaudía en xeneral, y los comentarios yeran cansinos a vegadas. Anque lu más priocupante pa min -midiupacifista cumu´l sapuconchu d´enriba- fonun aqueillos que nun allabanciaban la marcialidá del soldáu ni las muesas de cariñu, sinon las ganas de que las armas que s´amosaban entraran n´aición: ¡Quéi pepinu! ¡Cun esi tanquetu chegas a...! ¡Si fuera de mieu l´avión verías cumu...!
Peru tamién tuvu cousas bonas. Cumu la del rapacinu qu´en brazos del sou pai taba durmíu asgaya, queriendu dicire: "yía que la música militar nun súpume llevantare".
No hay comentarios:
Publicar un comentario